السجن داخل افكار الماضى

مع ألأسف ايوه ممكن اكون عايشه قدام الناس حياه كلها حريه بالجسد لكن انا سجينه لأفكاري او سجينه لموقف عدى في حياتي

د/ اميل جوزيف حكى قصه قابلها في المشوره وهي مفيده

انه حصل زياره من احد الصديقات لأسره عندها اكتر من بنت ومن محبة الام لصديقتها دخلتها غرفة البنات علشان يتكلموا سوا وفي الغرفه كانت البنت الصغيره نايمه لكن للأسف صحيت على صوت كلام مامتها مع الضيفه

الضيفه المزعجه حبت تواسي ألأم وقالتلها انه يا عيني عليكي كل بناتك زي القمر وبيض وحلوين ما عدا بنتك دي الصغيره دا حتى لما بتضحك سنانها بتبان وشكلها صعب مش زي باقي اخوتها الحلوين كمان صوتها وحش قوي كلهم دخلوا الكورال الا هي

تخيلوا المصيبه انه البنت اللي عندها 8 سنين سمعت الكلام دا

البنت دي لما كبرت وحكت اختبارها قالت كان كل اصحابي يروحوا يلعبوا وانا اقف تحت الشجره علشان مسودش ( يعني تبقى سمراء ) زياده , لو حد قال نكته مقدرش اضحك لحسن سناني تبان , مفكرتش ارنم لانه صوتي وحش

البنت دي قالت انه طنط مشيت من عندنا وانا اتسجنت في كلامها

موقف تاني

صديقه راحت تزور عيله واثناء تحضير السفره طنط طلبت من البنت اللي عندها 4 سنين انها تجيب معلقه من المطبخ البنت بمنتهى البراءه قالت لطنط مش هعرف فطنط سألتها ليه

قالتلها أصل انا غبيه ما ما بتقولي انه انا غبيه فمش هعرف اجيب المعلقه

شوفتوا المصيبه ماما قالت انه انا غبيه

عارفين دا اسمه ايه في علم النفس اسمه النبوءه ذاتية التحقيق

يعني لما حد يفضل يقول لشخص كلام سلبي بعد فتره الشخص دا لا شعوريا هيقتنع بالحقيقه دي وهيتصرف من خلالها وفي المثل دا العقل فعلا هيحد من قدراته ومن امكانياته والبنت هتتصرف بغباء بجد

لو عايز تحطم أي طفل قوله كلام سلبي ولو عايز تحطم أي بالغ قارن بينه وبين شخص تاني

الكتاب بيقول شجعوا صغار النفوس مقلش دمروا احباءكم
ـــــــــــــــــــــــــــــــــــــــــــــــــ

احنا كمان ممكن نكون اتحطينا في مواقف صعبه غيرت توجهتنا ونظرتنا للناس والاهم نظرتنا لنفسنا والمواقف دي خلتنا نتصرف بطريقه الي حد كبير غير متزنه .........طب الحل ايه

الحل انه نفحص نفسنا ونشوف افكارنا هل بنعاني من شعور بالرفض والوحده هل عندنا عقدة ذنب ومش بنقدر نغفر لنفسنا هل احنا بنثق اننا فاشلين , هل احنا مكتئبين ..................

خلو بالكم انه كل حد فينا ليه جواه صوره ذاتيه عن نفسه مختلفه تماما عن اللي الناس شيفاه من برا

يمكن يكون شخص ناجح جدا ومن جواه حاسس انه ولا حاجه وانه ملوش اي قيمه

طب اعمل ايه لو اكتشفت انه انا عندي مشكله او انا مجروحه من امر ما ؟

نص حل المشكله اني اعرف انه عندي مشكله وبعد كدا ادور على طريقه لحلها يعني خطوات الشفاء من الاكتئاب غير صغر النفس غير عقدة الذنب

انا هنا بس بفتح معاكم افكار علشان نقدر نناقش كل مشكله لوحدها

ممكن حد يفكر انه مش مهم ادور على علاج لمشكلتي دي مشكلتي لوحدي ومحدش ليه دخل ايه المشكله اني اكون مجروحه خصوصا مجتمعنا المتخلف مع اسفي واعتذاري للتخلف بيشوف المشاكل النفسيه عار وبيعتبرها جنون او عدم ايمان

مع الاسف اقولك انه طول ما انت مجروح فأنت قنبله موقوته بتنفجر في وش اللي حواليك وللأسف اللي حواليك هما أقرب الناس اليك يعني بتتحول من ضحيه لجاني

اقولكم حاجه من حياتي انا اول ما دخلت على النت من خمس سنين كنت بفضل انه يكون ليا اصحاب على النت لانه النت علاقته سطحيه ومش ممكن تتحول لصداقه دا عالم وهمي لانه انا الصداقه بالنسبه ليا كانت بتعني 4 كلمات

خنجر مسموم في ظهري

ولأني كنت مجروحه جدا قررت اشوف الناس من المنطلق دا مش عايزه اقولكم انا غلست على مين

من احد الشخصيات اللي غلست عليهم هو بابا الحج مكسيم وانا اعتذرتله من قريب افتكر لما طلب اننا نكون اصدقاء مش عايزه اقولكم كم الرخامه والغتاته اللي عملتها معاه بس نشكر ربنا انه مطفش واستحمل ..... كمان انا طفشت شويه من الاعضاء سوري بس دي الحقيقه واولهم كانت مريم البنت الفلسطينيه

ــــــــــــــــــــــــــــــــــــــــــــــــــ ـ

مش مهم اللي فات من حياتك مش مهم غلطت فيه ازاي مش مهم يكون أهلك وأقرب الناس اليك جرحوك أزاي المهم انه الرب الهك أمر بعتقك من الفكر دا

وانه الحل انه تغيروا عن شكلكم بتجديد أذهانكم

وبنعمة ربنا كل ما هاخد محاضره ليها علاقه بأي مشكله او اي بحث هلاقيه هنزله هنا لانه خطة الله لينا انه

" ايها الحبيب في كل شيء اروم ان تكون ناجحا و صحيحا كما ان نفسك ناجحة " ( 3 يو 1 : 2 )

ــــــــــــــــــــــــــــــــــــــــــــــــــ ــــ
شايف دموعك حتى اللي مش باينه في عنيك
لامس جروحك حنانه يشفي اللي بيك 2

القرار ::

قرب منه وحس بحضنه خلى الدفا يملا ضلوعك
صدق انه بيرعاك بحبه وفي وسط ليلك هو شموعك 3

عارف مشاعرك كل طموحك كل ماضيك
سامع انينك همس شفايفك عنيه عليه 2